2015年5月28日 星期四

轉貼: 我去見工,個經理要我用盡三國語言自我介紹



話說小弟上個星期炒咗老闆,今日就有間物流科記(Forwarder)叫我去見工,作為一個船務文員仔,出親mail都係幾個款,學識所有船務業嘅基本術語,同大陸倉庫或者班貨車佬互操老母,無幾耐就操得一口流利國語,基本上喺船務業界已經可謂橫行無忌。
不過,物流科記亦都係一個專門養育出奴才同地底泥嘅地方。無錯好多唔同行業都出產奴才,做核數會計朝九晚十二是常識吧,做Sales跑唔到數又要當眾跪地…不過船務業唔同在於,就算你係一張白紙,學歷仲低過新一代香港警察,你照樣可以入行,過幾年你亦都可以船務業嘅霸主。即係咩?即係乞衣囉!
從古至今,「聘請」同「應徵」就唔係一個對等關係。其實除咗whatsapp廿四小時侯命、放假要覆e-mail、唔OT代表唔勤力…喺未踏入一間公司成為老闆隻狗之前,喺見工時已經相當荒謬。
本來我約咗今日十點見工,我好識做咁提早十五分鐘上到呢間科記,一位個樣非常人事部嘅人事部阿姐(即係西口西面)帶咗我入房叫我填Form,除咗個人資料學歷同工作經驗,仲要求我填屋企人歲數、關係同職業…究竟對我工作有乜用?唔通我老豆做警察,我就唔可以係一個好人咩?
幾經辛苦終於填完,等咗半粒鐘,阿姐先走入黎問我填完未,又問我有冇帶相,因為要一張相用黎做Ref。我問佢點解要相,佢話怕見完一大批人唔認得我係邊個…
結果,我就好似個監犯咁企埋牆,拿住岩岩填完份Form畀個阿姐影相。
影完相之後,阿姐就收走我份Form叫我等陣,經理會黎見我。如是者,我又等多半粒鐘,本來見工之前仲好精神,喺間房度坐足成粒鐘坐到個人呆晒。我唔明白,公司經常要求員工準時返工,遲到一分鐘就呼天搶地,點解作為公司嘅上級高層,就可以完全無時間觀念?

最後,個經理終於慢條斯理咁行入黎。一坐低張Form望都唔望就放埋一邊:「你好,我叫阿Ash,你介紹一下你自己先。」
「吓?Ass?」
「我姓許,你叫我許生得喇。」
「咁啱嘅我都係姓許喎。我叫許…」我循例講吓自己工作經驗同內容。
Ash經理點一點頭,話「唔!不如你用國語介紹自己。」
我忍住道氣,將頭先講過嘅內容完全翻譯成國語講多一次…
佢又點一點頭,話「OK!不如你用英文介紹一次。」
「你老母湊…」
「英文,唔該。」
我虎軀一震,臉紅耳赤咁用英文再講多一次…
「你有冇瞭解過我哋公司?」許生問我。
「咪科記囉。」我答。
「我意思係有冇上過我哋公司網頁,瞭解我哋架構?」
「我真係一個外賣仔黎!我又唔係黎做卧底…」
「即係無啦?咁真係好遺憾,咁不如等我講一次…」老老實實,佢講嘅每一個字我都聽唔入耳,我亦唔明白,未屬於公司職員,為乜要理解公司架構。
講咗大約五分鐘之後,佢終於講完,我捉緊呢個機會,同佢講:「不如你用國語介紹一次公司架構。」
「吓?不如你講吓自己有咩優點缺點?」阿Ash錯愕,扮聽唔到我講野。
「我優點已經寫晒落份Form度,不過你無睇過,真係好遺憾,我缺點就係無缺點…」我撥一撥頭髮。
「……」我見佢面色一沉,然後話:「你、你返去等消息啦。」

結果,我畀個人事部阿姐抄完牌,影埋車頭相,仲要同個經理玩咗場馬騮戲,足足花咗我兩個鐘頭。每見一次工,我都覺得自己慘過隻狗,我已經係為咗份人工,申請入去做老闆隻狗,阿Ass經理叫我遞手我就遞手,叫我坐低我就坐低,事後竟然連塊狗假都無…
所以,我真係好唔鍾意見工嗰種被侮辱嘅感覺。但好無奈地,就算我面試成功,萬一都係入到一間whatsapp廿四小時侯命、放假都要覆e-mail、唔OT代表唔勤力嘅公司。相信唔洗幾耐,我又要面對下一次面試。
又或者見多幾次,做多幾年狗,我體內團火就會熄,我就會被個社會打磨得我圓圓滑滑,變成另一個「Ass 許」。

後記
看了過文章, 我已經比人玩左6-7次 都未完
又要面對下一次面試
但無奈我真的需要一份工
只有繼續努力



http://www.vjmedia.com.hk/articles/2015/05/27/107609

沒有留言:

張貼留言